Policia e Durrësit ka vënë në pranga një 25-vjeçar, i cili tentoi të korruptonte shefin e policisë kufitare, për ta lejuar të udhëtonte drejt Italisë pavarësisht se nuk plotësonte kriteret e përcaktuara për lëvizjen e lirë.
Shtetasi Alvaro Çaushaj, banues në Tiranë është arrestuar në kushtet e flagrancës, teksa i ka ofruar shefit të policisë 40 euro, për ta lejuar të nisej me traget drejt Italisë.
“Efektivat e Drejtorisë Rajonale të Kufirit dhe Migracionit, Durrës, më datë 25.12.2015, bënë të mundur ndalimin e shtetasit: Alvaro Çaushaj 25 vjeç, banues në Tiranë, pasi ka tentuar të korruptojë duke i ofruar 40 € Shefit të Stacionit të PKM Durrës, sepse në momentin që është paraqitur në P.K.K. Durrës, për të udhëtuar në Itali me tragetin e linjës Bari–Durrës, i është refuzuar dalja për arsye se: nuk plotësonte kushtet financiare për në destinacionin e planifikuar; nuk justifikonte qëllimin dhe rrethanat e qëndrimit të planifikuar si dhe kishte ndalim hyrje në Zonën Shengen. Për veprime të mëtejshme, materialet i kaluan Seksionit për Krimin Ekonomik dhe Financiar në Drejtorinë Vendore të Policisë Durrës, për veprën penale “Korrupsioni aktiv i personave që ushtrojnë funksione publike”. thuhet në njoftimin e Policisë së Durrësit.
