Kryeministri Edi Rama dhe kryetari i Kuvendit, Ilir Meta, nuk do ta dëgjojnë sot thirrjen e opozitës për qeveri teknike dhe zgjedhje të reja, pasi që të dy do të jenë jashtë Shqipërisë. Kuvendi do të zhvillojë seancën e fundit parlamentare për këtë vit, ashtu si dhe opozita protestën e fundit, të cilën e ka marrë përsipër Forumi Rinor. Por, dy personat të cilëve iu drejtohen më së shumti kritikat dhe akuzat e opozitës nuk do të jenë.
Kryeministri Rama do të jetë në një vizitë zyrtare në Izrael. Pikërisht sot, Rama do të takojë kryeministrin e Izraelit, Benjamin Netanyahu, shkruan Gazeta Shqiptare. Ndërsa nesër është planifikuar edhe një takim me Presidentin e Izraelit, Reuven Rivlin.
Po kështu, Kuvendit do t’i mungojë për tri ditë me radhë edhe kryetari i tij, Meta. Ai do të jetë në një vizitë zyrtare në Beograd, nga data 21 deri më 23 dhjetor. Kjo vizitë e kreut të Kuvendit zhvillohet në kthim të vizitës së kryeparlamentares serbe, Maja Gojkoviç, e cila qëndroi në prill në Tiranë. Meta gjatë kësaj vizite do të takohet me të gjithë krerët e shtetit të Serbisë, presidentin Tomislav Nikoliç, po ashtu do të takohet edhe me kryeministrin serb, Aleksandar Vuçiç dhe homologen e tij në Beograd.
Kjo vizitë pritet të ketë qëllimin e bisedave për përmirësimin e marrëdhënieve në mes të Shqipërisë dhe të Serbisë, në mënyrë që të vazhdohen aktivitetet që kanë nisur vitin e kaluar. Kjo është hera e tretë që Meta viziton Beogradin. Vizitën e parë e ka zhvilluar si ministër i Jashtëm, të dytën si kryetar i LSI-së, i ftuar nga presidenti i atëhershëm i Serbisë, Boris Tadiç.
Ndërkohë, në seancën e sotme parlamentare nuk është planifikuar ndonjë projektligj i rëndësishëm për të kaluar.
Ndër ato projektligje që pritet të diskutohen dhe të marrin më shumë vëmendjen e deputetëve është ai “Për amnistinë”. Një tjetër është projektvendimi “Për miratimin e strukturës, organikës dhe kategorizimeve të pozicioneve të punës të Inspektoratit të Lartë të Deklarimit dhe Kontrollit të Pasurive dhe Konfliktit të Interesave”. Deputetët pritet të votojnë sot projektligjin “Për lojërat e fatit në Republikën e Shqipërisë”.
