Ylli Manjani ka komentuar raportimet e shpeshta, se shqiptarët janë trafikantë të mëdhenj droge.
Ai thotë se këto raportime janë të rreme.
“Tani që të orientohemi pak se nga lajmet e kronikës dhe analizat politike, krijohet ideja e rreme se shqiptarët janë herë qendra e herë kokat e trafikut e të drogës në Europë. Madje këtë ide false, e ushqejnë edhe lajmet me arrestime të shqiptarëve nga shqiptarët.
A të bëjmë një hesap si fillim?
Në hapësirën e BE, ku jetojnë rreth 500 milionë banorë në shtetet përkatëse, sipas statistikave zyrtare janë të paktën 100 milionë njerëz në këtë hapësirë që marrin drogë.
Natyrshëm këto e blejnë mallin në tregun e zi, jo në dyqan.
Upssss! Treg i zi në Europë… Jo në Shqipëri, por në Europë…
Tani si mendoni ju, që disa dhjetëra shqiptarë, të cilët gjithsesi edhe aq sa janë, punojnë me kokë në trastë, janë furnitorët kryesorë të këtij tregu?!
Po në cilën llogjikë bazohet kjo?!
Pse ore shqiptarët janë fajtorët kryesorë në rruzull se gati 1 në 3 europianë marrin drogë?!
Si ka mundësi që institucionet tona dhe mendimi ynë publik e sheh këtë problem tek shqiptarët, të cilët në fund të fundit, gjithnjë aq sa janë, u shërbejnë atyre që mallosen?
Si ka mundësi që politika jonë gjithashtu fajson shqiptarët për drogën që kërkojnë të uriturit në Europë e Britani?
Apo po iu ofron alternativë më të mirë pune e bisnesi në Shqipëri?!
Sinqerisht nuk e kuptoj fare, po fare fare këtë logjikë absurde ku shqiptari burgos e damkos shqiptarin pse dynjaja malloset në drogë!
Dynjaja po të ketë këllqe le ta legalizojë këtë punë dhe historia mbaron. Nëse jo, nuk u kemi ne faj.
Drogën nuk e shpikëm ne.
Atë e gjetëm midis europianëve”, shkruan Manjani.
