1 vit nga tërmeti/ Lleshaj: Respekt e mirënjohje për punonjësit e Policisë, zjarrfikësit e personelin shëndetësor

Ministri i Brendshëm Sandër Lleshaj ka kujtuar ditën e sotme tërmetin e një viti më parë që mori 51 jetë njerëzish dhe plagosi qindra të tjerë.

Lleshaj ka ndarë në Facebook një foto nga rrënimi i një pallati ku krahas saj shkruan se shpreh respektin për punonjësit e policisë, zjarrëfikëset, personelin shëndetësor dhe të gjithë miqtë që na ndihmuan nga bota.

‘Sot përkujtojmë me dhimbje viktimat e tërmetit të 26 nëntorit 2019 dhe shprehim respekt e mirënjohje për punonjësit e Policisë, zjarrfikësit, personelin shëndetësor, miqtë që erdhën nga bota dhe gjithë ata që me përkushtim, solidaritet dhe sakrificë kontribuan që të shpëtohej jeta e shumë shqiptarëve të tjerë’- shkruan Lleshaj.

Postimi

Tërmeti i 26 nëntorit me magnitudë 6.4 ishte një nga më të fortët që është regjistruar ndonjëherë në vendin tonë. Si pasojë e lëkundjeve të forta u shembën qindra ndërtesa, duke lënë të pastrehë mijëra shqiptarë. Po ashtu humbën jetën edhe 51 persona, të cilët mbetën nën rrënojat e ndërtesave.

g.kosovari