Zbulohen emrat e shqiptarëve të tjerë të kapur në Greqi, si pjesë e një grupi kriminal që transportonte drogë. Bëhet fjalë për Ervis Caushi nga Përmeti, Emiljano Kolën nga Vlora si dhe për 32-vjecarin nga Saranda Alban Baxheri.
Gjithashtu edhe një person tjetër nga Përmeti me inicialet B.K. është pjesë e këtij rrjeti. Emiljano Kola dhe Alban Baxheri kanë qenë në skafin ku transportohej 1.6 ton drogë, ndërkohë që edhe Ervis Caushi ka pasur rol kyç në trafikun e saj.
Për të 4 shqiptarët, Policia e Shtetit ka kryer kontrolle në banesat e tyre, por nuk janë gjetur prova që i lidhin me trafikun e drogës. As në Vlorë, as në Sarandë dhe as në Përmet nuk është arritur të sekuestrohen materiale për shqiptarët e arrestuar në Greqi.
Policia e Shtetit konfirmoi se janë kryer kontrolle në disa banesa, për emrat që kanë ardhur nga Greqia, por nuk dha detaje të tjera për rolin e shqiptarëve të arrestuar në shtetin helen, si pjesë e një bande që merrej me trafikun e drogës nga Shqipëria drejt Greqisë, Italisë dhe Turqisë.
Gjithashtu këta persona nuk kanë qenë të dënuar më parë, përveç Alban Baxherit që është shoqëruar disa herë në komisariatin e Sarandës.
