Kineasti i shquar, Dhimitër Anagnosti ka kremtuar 80-vjetorin e lindjes me një organizim shumë të këndshëm. Anagnosti është quajtur eventi që është organizuar nga Qendra Kombëtare e Kinematografisë dhe Arkivi Qendror Shtetëror i Filmit me rastin e 80-vjetorit të regjisorit të mirënjohur, Dhimitër Anagnosti, një nga emrat e nderuar të shkollës kinematografike shqiptare.
Anagnosti është regjizor i disa prej filmave më të njohur shqiptar, si para dhe pas viteve 1990. Disa prej tyre janë: Përrallë nga e kaluara, Cuca e Maleve, Lulkuqet mbi mure, Dueli i heshtur, Gjoleka djali i Abazit, Plage të vjetra, Komisari i Dritës. Studimet për kinematografi i ka kryer në Moskë. Në karrierën e tij 40-vjeçare ka realizuar 14 filma artistikë, 10 filma dokumentarë, ka fituar mjaft çmime në konkurrime të ndryshme kombëtare e ndërkombëtare. Është autor i 15 skenarëve dhe pothuajse në të gjithë filmat e tij skenarin e ka shkruar vetë.
Dhimitër Anagnosti, vlerësohet si regjisori shqiptar më i rëndësishëm i shekullit të kaluar. Ai ka lindur në Vuno. Filloi punë si operator në Kinostudion “Shqipëria e re” në 1961, me filmin “Debatik” (1961) e më pas me filmin “Toka jonë” (1964). Xhiroi edhe të parin film dokumentar me ngjyra “Gurët dekorativë”.
