Kryetari i LZHK-së, Dashamir Shehi, dhe kreu i Bindjes Demokratike, Astrit Patozi zyrtarizuan të premten marrëveshjen për garimin e përbashkët në zgjedhjet lokale të 14 majit.
I ftuar në studion e Euronews Albania Shehi tha se objektivi i koalicionit të tyre është që çdo votë kundër qeverisë t’i shkojë kandidatit të opozitës, nëse ai do jetë 1 i vetëm.
Sipas Shehit, qëllimi i garimit të tyre veçmas bëhet me qëllimin që opozitës t’i shkojnë dhe ato vota të cilat janë kundër Ilir Metës dhe Sali Berishës.
“Ne do bëjmë maksimumin që çdo votë e mundshme t’i shkojë opozitës, edhe votat e atyre që nuk pëlqejnë Metën apo Berishën. Uroj që kandidatët të jenë të vetëm, që të mos bëjnë një rrëmujë në popoll. Se po dolën dy, le të dalin dhe tre a katër, pastaj. Ne do të shkojmë t’i mbështesim, por do mbështesim dhe idenë tonë alternative brenda opozitës. Gjithmonë në fumksion të luftës kundër Partisë Socialiste dhe Edi Ramës. Kush nuk është në betejë me Edi Ramën nuk ka vend në opozitën shqiptare. Për ne kjo është filli i kuq, këtu ndahen historitë. Pastaj seç bëjmë ne në oborrin e shtëpisë tonë, kjo është temë e jona. Unë mendoj se ka ardhur koha që të hapet diskutimi ç’është e mira apo e keqja”, tha Shehi.
/s.f
