Komisioni i Verifikimit i Federatës Shqiptare të Futbollit ka zyrtarizuar këtë të enjte delegatët dhe kandidaturat për Asamblenë e Përgjithshme Zgjedhore të FSHF-së, e cila do të mbahet më 16 shkurt 2026.
Pas përfundimit të afatit zyrtar për depozitimin e kandidaturave, Komisioni zhvilloi mbledhjen e radhës, ku u shqyrtuan propozimet për postin e Presidentit, kandidatët për anëtarë të Komitetit Ekzekutiv, si dhe delegatët e propozuar nga anëtarët e federatës.
FSHF bën me dije përmes një njoftimi për mediat se gjatë procesit të verifikimit, Komisioni analizoi çdo kandidaturë në përputhje me kriteret statutore dhe ligjore, duke vlerësuar integritetin personal dhe përmbushjen e kërkesave të parashikuara në Rregulloren e Asamblesë së Përgjithshme të FSHF-së.
Në përfundim të verifikimit, u konstatua se 13 kandidatë për anëtarë të Komitetit Ekzekutiv kanë siguruar dy propozimet e nevojshme nga anëtarët e Asamblesë dhe plotësojnë kushtet për të marrë pjesë në garën zgjedhore.
Ndërsa për postin e Presidentit të Federatës Shqiptare të Futbollit është regjistruar vetëm kandidatura e Armand Dukës, i propozuar nga 33 anëtarë të federatës, duke e bërë atë kandidatin e vetëm në këtë garë.
13 kandidatët për Komitetin Ekzekutiv:
Abdyl Kuriu
Anila Basha
Arben Dervishaj
Armando Cungu
Blendi Fevziu
Edmond Hasanbelli
Envi Hicka
Erind Resuli
Ervin Canollari
Geri Çipi
Gjergji Petro
Lutfi Nuriu
Pano Xhixho
Gjithashtu, Komisioni zyrtarizoi listën e delegatëve të anëtarëve të FSHF-së për Asamblenë e datës 16.02.2026, në përputhje me numrin e delegatëve të përcaktuar në Vendimin Nr. 1, datë 03.12.2025.
Asambleja e Përgjithshme Zgjedhore e FSHF do të zhvillohet më 16 shkurt 2026, në orën 10:00, në ambientet e “Shtëpisë së Futbollit”. Gjatë Asamblesë do të zgjidhen Presidenti dhe anëtarët e Komitetit Ekzekutiv të FSHF për mandatin e ri katërvjeçar.
