Irani ka dhënë për herë të parë publikisht detaje mbi plagët e marra nga Mojtaba Khamenei, udhëheqësi i ri suprem iranian, në të njëjtin sulm ajëror amerikano-izraelit ku u vra babai i tij më 28 shkurt.
Në një video të publikuar në rrjetet sociale nga Nour News, një agjenci lajmesh e lidhur me Këshillin Suprem të Sigurisë Kombëtare të Iranit, një zyrtar iranian ka konfirmuar se Mojtaba Khamenei ka pësuar dëmtime në gju dhe në shpinë pas sulmit, duke siguruar njëkohësisht se ai është në “gjendje të mirë shëndetësore”.
Mazaher Hossein, koordinator i lartë i takimeve qeveritare, shton se bashkëshortja e Mojtaba Khamenei është vrarë në të njëjtin sulm.
Edhe pse figurë e rëndësishme e Iranit nuk është parë apo dëgjuar që nga fillimi i luftës, pavarësisht se në fillim të marsit u caktua si pasardhës i babait të tij, deri më tani në televizionin shtetëror janë transmetuar vetëm tekste dhe deklarata.
Sipas Hossein, gjuri i tij pritet të shërohet së shpejti dhe problemet me shpinën janë zgjidhur. Khamenei thuhet se ka pësuar edhe një prerje të lehtë pas veshit, e padukshme për shkak të çallmës, por që është trajtuar.
Mungesa e gjatë e Mojtaba Khamenei nga skena publike ka nxitur spekulime mbi përfshirjen e tij në drejtimin e përditshëm të vendit.
Zyrtarë iranianë kanë deklaruar se ai po mban një profil të ulët për arsye sigurie. Në video, Mazaher Hossein ka siguruar se Khamenei do t’u drejtohet iranianëve “në momentin e duhur”.
