OSBE është e gatshme të ndihmojë për të lehtësuar dialogun mes mazhorancës dhe opozitës në krizën që ka prekur Shqipërinë në prag të zgjedhjeve parlamentare.
Kryetari i Kuvendit Ilir Meta priti një delegacion të Asamblesë Parlamentare të OSBE që përbehej prej Roberto Battelli, Zv. President i AP OSBE, Andreas Nothelle, Përfaqësues i Veçantë i AP OSBE dhe Bernd Borchardt, Ambasador i OSBE në Tiranë.
Meta shprehu mirënjohjen për bashkëpunimin e deritanishëm me Asamblenë Parlamentare të OSBE.
“OSBE ka një rol të rëndësishëm për forcimin e demokracisë dhe përmirësimin e standardeve të zgjedhjeve në Shqipëri”, tha Meta.
Kryesuesi i delegacionit, Battelli u shpreh se OSBE “është e gatshme të ndihmojë në lehtësimin e dialogut politik në vendin tonë”.
“Progresi demokratik i Shqipërisë i shërben paqes dhe stabilitetit në rajon”, tha Battelli.
Ndërkohë, kryeparlamentari vuri theksin se “Shqipëria ka nevojë për një marrëveshje të përgjegjshme mes palëve”.
Zgjidhja – sipas Metës – duhet të bazohet në gjithëpërfshirje dhe dialog konstruktiv politik.
“Askush nuk duhet të luajë me fatin e qytetarëve shqiptarë. Sot më shumë se kurrë nevojitet pjekuri, përgjegjshmëri kombëtare dhe vullnet për të gjetur kompromisin e munguar. Kompromisi është në interes të zgjedhjeve të lira e të ndershme”, përfundoi Meta./a.m.
