Ministri i Transportit dhe Infrastrukturës, Sokol Dervishaj dhe ndihmës-Sekretari i Departamentit të Sigurisë në SHBA, Alain Bersin ndoqën nga afër zbatimin e masave të sigurisë në Portin e Durrësit. Ministri Dervishaj u shpreh shumë i kënaqur për vizitën e Bersin në portin e qytetit bregdetar dhe tha se kishin si synim të rrisnin kapacitet nga ky bashkëpunim i shkëlqyer.
“Jemi shumë të privilegjuar që kemi z. Bersin për vizitë këtu. Prania e tij është një shenjë e qartë e bashkëpunimit që kemi me SHBA-në. Bashkëpunimi me SHBA-në është i shkëlqyer, dhe qëllimi ynë është të rrisim kapacitetet. Jemi të angazhuar maksimalisht që të përmbushim sfidat që kanë lidhje me sigurinë,” tha Dervishaj.
Nga ana tjetër, ndihmës-Sekretari i Departamentit amerikan të Sigurisë, falënderoi Dervishajn për mikpritjen dhe foli fjalë të mira porsa i përket nivelit të sigurisë në Portin e Durrësit.
“Falenderoj mikun dhe kolegun tim z. Dervishaj për mikpritjen dhe angazhimin e tij në punë. Gjatë vizitës që bëra këtu, dal me mbresa pozitive, konstatoj që niveli i sigurisë është i kënaqshëm”.
Alain Bersin gjithashtu shprehu besimin se Administrata e re amerikane do të vazhdojë të mbështesë Shqipërinë në aspektin e sigurisë.
ma.me
