Në ceremoninë mortore për kreun e Federatës së Futbollit të Kosovës, Fadil Vokrri, i cili vdiq dje, në Prishtinë kanë ardhur zyrtarë të lartë të futbollit të Serbisë dhe nga ish-klubi ku luajti Vokrri – Partizani i Beogradit.
KALLXO.com merr vesh se në Prishtinë për t’i dhënë lamtumirën e fundit kanë ardhur ish-kryetari i Federatës Serbe të Futbollit, Tomisllav Karaxhiq dhe kryetari i klubit Partizani, Millorad Vuçeviq.
Mediumi ka siguruar fotografi të veturave me të cilat kanë ardhur nga Beogradi zyrtarët e futbollit serb.
Për sigurinë e këtyre zyrtarëve të lartë po përkujdeset Policia e Kosovës.
Në homazhet e zhvilluara në hollin e Kuvendit të Kosovës është parë edhe zyrtari i FIFA-s, Zvonimir Boban. Këto janë fotot e veturave të zyrtarëve të futbollit serb që kanë ardhur në Prishtinë për t’i dhënë lamtumirën e fundit legjendës së futbollit kosovar, Fadil Vokrri, i cili ka qenë edhe lojtar i klubit beogradas Partizani dhe i përfaqësueses së Jugosllavisë.
