Kryetari i Parlamentit të Maqedonisë Trajko Veljanovski ka shpallur sot zgjedhjet e parakohshme parlamentare më 5 qershor. “Bazuar në kompetencat e mia kushtetuese dhe ligjore dhe në përputhje me vendimin për të shpërbërë Parlamentin, sot nënshkrova dekretin për caktimin e zgjedhjeve të parakohshme për deputetë që do të mbahen më 5 qershor 2016. Vendimi për shpalljen e zgjedhjeve e kam dorëzuar në Komisionin Shtetëror të Zgjedhjeve të Republikës së Maqedonisë si organ për zbatimin e zgjedhjeve, te Ministria e Drejtësisë dhe Ministria e Punëve të Jashtme “, thuhet në deklaratën e dërguar mediave.
Përkujtojmë se pjesa më e madhe e partive opozitare në Maqedoni kanë paralajmëruar bojkot të zgjedhjeve për shkak se nuk janë siguruar kushtet që ato të jenë fer dhe demokratike. Opozita dhe një pjesë e shoqërisë civile kërkojnë shtyrjen e zgjedhjeve pa afat, respektivisht deri sa të krijohen kushtet që ato të jenë demokratike.
