Pas debatesh të nxehta, Senati amerikan e konfirmoi me 52 vota pro dhe 47 kundër të emëruarin e Donald Trump-it për postin e Prokurorit të Përgjithshëm, Jeff Sessions.
Konfirmimi vjen pas një serie seancash të vështira dëgjimore gjatë të cilave demokratët e sulmuan Sessions për historikun e tij me të drejtat civile.
Elizabeth Warren u përpoq të kujtonte akuzat historike për racizëm drejtuar senatorit të Alabamës, por e detyruan që të heshtë. Emërimi i Sessions është një ndër më të debatueshmit e presidentit të ri amerikan.
Votimi në Senat ndoqi linjat partiake dhe për Kryeprokurorin e ri u shpreh pro vetëm një demokrat, Joe Manchin nga Virxhinia Perëndimore.
Sessions do të marrë tani në dorë frerët e Departamentit të Drejtësisë së bashku me 113.000 punonjësit e tij, ndër të cilët edhe 93 avokatë shtetërorë, shkruan tch. Senatin e kontrollojnë republikanët dhe për të miratuar këtë emërim, atyre nuk u nevojitej veçse një shumicë e thjeshtë. /a.k
