Pas përfundimit të provimeve të Maturës Shtetërore, të rinjtë që kanë vendosur të vijojnë studimet e larta duhet të aplikojnë në faqen zyrtare të portalit U-Albania nga data 27 korrik deri më 1 gusht 2026.
Drejtori i Rrjetit Akademik Shqiptar, Arjan Xhelaj, sqaron se, ashtu si çdo vit, ky proces nis me pagesën e tarifës së aplikimit për në universitet prej 2 000 lekësh. Detyrimi duhet të kryhet nga data 3–26 korrik.
“Portali është i hapur dhe do të jetë i hapur gjatë gjithë kohës. Pas datës 20 priten të na vijnë të dhënat, që është pjesa e notave për tre vitet e gjimnazit dhe notat e maturës. Nga data 21–22, maturantët deri më datën 27 do të kenë akses për të parë të dhënat e tyre në portal, me fillimin e procesit të aplikimit më 27, që është data kur nis procesi dhe vijon për gjashtë ditë, siç ka qenë çdo vit”, tha ai.
Maturanti ka të drejtë të zgjedhë deri në 10 programe studimi, sipas preferencave të tij. Aplikimi mund të kryhet në çdo mjedis ku ka akses interneti, si në shtëpi, nëpërmjet telefonit, por edhe pranë çdo shkolle të mesme, në rastet kur do të kenë nevojë për t’u konsultuar me mësuesit.
“Ti mund të aplikosh nga çdo kompjuter, pikë interneti në Shqipëri apo jashtë Shqipërisë. Mjafton që të kesh idetë e qarta, sepse pas mbylljes së procesit, në momentin që e ke konfirmuar aplikimin, nuk mund të rikthehesh mbrapa për të bërë një aplikim tjetër. Pas mbylljes së procesit të aplikimit, për ata maturantë që kanë aplikuar në degë që kanë konkurs, duhet të bëjnë shumë kujdes dhe të shikojnë datat e shpalljes së konkursit”, tha ai.
Pas kryerjes së regjistrimit në degën përkatëse, çdo maturant ka të drejtën e çregjistrimit për 2 ditë rresht në fund të çdo raundi, nga një program studimi që ka zgjedhur më parë, për t’u regjistruar kështu në një tjetër program studimi.
Raundi i dytë i aplikimit nis nga 15 deri më 17 shtator, ndërsa raundi i tretë fillon nga datat 8 tetor deri më 21 tetor 2026.
