Rreth 150 mijë shtetas shqiptarë duhet të riaplikojnë për pasaporta për fëmijët e tyre, për shkak të një gabimi teknik gjatë prodhimit të dokumentit biometrik në vitet 2009-2010.
Në një intervistë për gazetën “Shekulli”, drejtori i Përgjithshëm i Gjendjes Civile, Bledar Doracaj, pohon se, pasaportat, për shtetasit deri në 16 vjeç, aksidentalisht janë prodhuar me afat 10-vjeçar, ndërsa duhet të ishin me afat përdorimi për 5 vite.
Sipas ligjit, për pajisjen me pasaportë të shtetasve shqiptarë, afati i vlefshmërisë për shtetasit nën 16 vjeç është 5 vite. Për periudhën prill 2009 dhe korrik 2010, Ministria e Punëve të Brendshme ka prodhuar 150 mijë pasaporta për shtetasit nën 16 vjeç në momentin e aplikimit, të cilët kanë pasur afat të pasaktë në vlefshmëri.
“Në vend që të ishte për 5 vite, ishte bërë 10 vite dhe kjo ka ndodhur për shkak të një gabimi teknik në sistem, që u konstatua me vonesë dhe ndryshimet e nevojshme për përmirësimin e sistemit, bënë që të identifikoheshin gjatë kësaj periudhe në pasaportat e tyre” shprehet drejtori Doracaj.
I pyetur nga ‘Shekulli’ se kush e mban koston e rinovimit të pasaportave, Doracaj thotë:
“Nëse kompania private “Aleat” do të kërkonte që të bëheshin rinovimet e pasaportave brenda afatit 5-vjeçar, atëherë kostoja do të ishte e padiskutueshme e kompanisë, ndërsa në rastin konkret i mbetet qytetarit për të paguar rinovimin e dokumentit biometrik”.
