Zyrat me një ndalesë (One Stop Shop) kanë kufizuar në maksimum korrupsionin në sportelet e bashkive. Falë Projektit Star 2, që zbatohet nga UNDP në bashkëpunim me Ministrinë e Brendshme, në 8 Bashki të vendit, Sistemi Informatik i Zyrës me Një Ndalesë (SIZN), është tashmë plotësisht funksional. 14 bashki të tjera janë duke u përgatitur për vënien në funksionim të këtij sistemi. Brenda muajit Dhjetor 2019 është parashikuar që sistemi të jetë funksional në 49 bashkitë.
Këto ndërhyrje po kryhen në kuadër të Projektit STAR 2- që mbështetet nga shumë partnerë ndërkombëtarë të zhvillimit përmes një mekanizmi të përbashkët financimi, ku përfshihen: Bashkimin Evropian, Qeveritë e Suedisë, Italisë, Zvicrës, USAID, UNDP dhe Qeverisë së Shqipërisë.
Bashkia Elbasan ishte e para që e përqafoi ofrimin e shërbimeve nëpërmjet SIZN, dhe aktualisht sistemi është funksional në trembëdhjetë njësitë administrative të saj.
Një grup gazetarësh morën pjesë në një tur inspektimi nga afër të efekteve të këtij projekti në disa bashki. Gjatë një vizite në Njësinë Administrative Bradashesh, të bashkisë Elbasan, gazetarët folën me banorët që përfitonin shërbimet.
“Një vit më parë më duhet të lija punën, të merrja taksinë dhe të shkojë në bashkinë e Elbasanit për të marrë shërbimet, duke u sorrollatur nga një zyrë në tjetrën. Jo gjithmonë i gjeja nëpunësit në zyrë dhe jo gjithmonë mbaroja punë”, tha për “Panorama”, Hyqmet Salla banor i njësisë administrative Bradashesh.
Kryetari i Bashkisë së Maliqit, Gëzim Topçiu i kënaqur me funksionimin e zyrës, tha se sistemi po shtrihet edhe në njësitë administrative, ndërsa institucioni që drejton u përgjigjet më shërbime afro 70 mijë banorëve. “Qytetarët nuk shkojnë më në Korçë, të sorollatën për zyra të tjera. Zyra i ofron qytetarit dhjetra shërbime, ndërsa sistemi ne na jep mundësinë që të kontrollojmë se në ç’fazë ndodhet aplikimi/kërkesa e qytetarit”, tha kreu i bashkisë Maliq.
Ndarja e re territoriale, përfshirja e shumë zonave rurale brenda një bashkie, çoi automatikisht largësinë e shërbimeve për qytetarët. Për të mbyllur këtë distancë por dhe për ta bërë të suksesshme këtë reformë erdhi për zbatim Projekti Star 2.
“Prej nisjes së projektit është rritur numrin e shërbimeve të ofruara për qytetarët nëpërmjet ketij sistemi. Shërbimet ofrohen në kohë më të shpejtë dhe pa shkaktuar stres tek qytetarët. Gjithçka realizohet në rrugë elektronike. Veçoritë specifike të SIZN mundësojnë përmirësimin e mënyrës së ofrimit të shërbimeve administrative nga qeveritë vendore, duke reduktuar ndjeshëm kohën, distancat dhe burokracitë me të cilat duhet të përballen qytetarët. Gjithashtu, ato do të pajisin vendimmarrësit me evidencë mbi performancën, duke kontribuar në rritjen e efikasitetit, transparencës dhe llogaridhënies”, u shpreh Silvana Malaj, drejtuese e projektit.
/a.meta
