Zëvendëskryeministri i Qeverisë së Republikës së Kosovës nga radhët e Listës Serbe, Branimir Stojanoviq është i bindur se “Lugina e Diellit” në veri të Mitrovicës do të ndërtohet.
Projekti për ndërtimin e 300 shtëpive në një vend dhe kthimin e një mijë serbëve ka filluar së ndërtuari më 9 qershor kur i ashtuquajturi shefi i Zyrës për Kosovë në Qeverinë e Serbisë, Marko Gjuriq, vuri gurthemelin, edhe pse këtë projekt Ministria e Mjedisit dhe Planifikimit Hapësinor e konsideronte si projekt të jashtëligjshëm, transmeton Koha.net.
Për këtë, Stojanoviq thotë se do të përmbushen të gjitha kërkesat ligjore dhe ajo lagje do të ndërtohet, duke u referuar edhe në pajtimin e kryetarit të Komunës së Zveçanit që të përmbushen të gjitha procedurat që kërkohen.
Branimir Stojanoviq ka thënë se deri më tash nuk ka pasur kthim substancial të serbëve në Kosovë sepse nuk janë krijuar parakushtet e një kthimi të qëndrueshëm.
“Deri tash kemi pasur vetëm fotografi të një rezultati të përkohshëm, i cili është portretizuar si një kthim. Prandaj është i rëndësishëm projekti “Lugina e Diellit” dhe pa mëdyshje që ne do të insistojmë për të”, ka thënë ai. (b.an)
