Zëvendësministri i Infrastrukturës dhe Energjisë, Artan Shkreli deklaroi sot në një intervistë për ATSH-në se ekziston një plan që stoku i inerteve nga shkatërrimi i asaj çka ka mbetur nga tërmeti i 26 nëntorit do të grumbullohet në disa zona, ku zona kryesore është Porto Romano.
“Është zgjedhur Porto Romano, vendi ku ka qenë vend grumbullimi i plehrave të qytetit, kancer disa dekadash të asaj zone që ka sjellë degradimin, jo vetëm të asaj zone, por edhe të fshatrave përreth, duke qenë një ndër vendet me rrezikshmëri të lartë për shëndetin e njerëzve përveç efekteve të tjera kolaterale në mjedis”, theksoi Shkreli.
Sipas tij, e gjithë ajo zonë që është edhe më e degraduara e Shqipërisë do të shndërrohet në një Park të bukur.
“Këto inerte, shpjegoi ai, pasi të përpunohen, do të depozitohen aty duke krijuar ndoshta disa kodra artificiale, të cilat të përziera me dherat e hedhura aty do të krijojnë një park që do të jetë parku i Memories së këtij qyteti.
“Do të shndërrohet nga një park i degraduar në një park periferik të zones së Durrësit, ku do mbillen pemë e hapësira të tjera për hapësira kreative”, tha Shkreli.
Ky proces ka nisur, vuri ai në dukje, dhe paralel me shembjen e objekteve të shkatërruara nga tërmeti bëhet dhe asgjësimi i inerteve, pra lirimi i shesheve, ku këto objekte po prishen.
“Në mënyrë të mos ndodh ajo që ka ndodhur gjithmonë, ku inertet liheshin aty duke krijuar edhe rrezikshmëri për jetën e njerëzve, flota e krijuar qëllimisht merret me transportimin në vendin ku përpunohen dhe pastaj dërgohen në Porto Romano”, deklaroi Shkreli. /e.s/
