Numri dy i drejtësisë në Kosovë, Lirak Çelaj, ka shprehur bindjen se institucionet e drejtësisë në Kosovë po i frikësohen lëvizjes Vetëvendosje.
“Policia, prokurorët e gjyqtarët po frikohen nga Vetëvendosje. Sepse nëpër konferenca për shtyp, nëpër parulla e afishe po linçohen nga anëtarët e Vetëvendosjes”, ka thënë në “Interaktiv”të KTV-së, Lirak Çelaj, zëvendësministër i Drejtësisë.
“Presionet që këta u bëjnë këtyre personave po bënë që ata të përtojnë që të merren me këto lëndë”, ka thënë Çelaj, teksa ka thënë se nga pozita e zëvendësministrit e di që kjo është deklaratë serioze.“Por e them me përgjegjësi të plotë”, ka thënë ai.
Çelaj nuk e ka kontestuar se Prokuroria e Policia për Krime ekonomike kanë shumë punë në Komunën e Prishtinës. Ka përmendur këtu rastin me projektin “Kodrina” dhe atë me çerdhet me bazë në komunitet.
“Janë vetëm dy nga shkeljet e panumërta të ligjit që ka bërë Shpend Ahmeti. Në rastin ‘Kodrina’ është rasti mbase i njëjtë si te Ramadan Muaj, kryetar i Prizrenit. Unë nuk po them se duhet dënuar, sepse nuk e jap verdiktin, por po them pse nuk po nis procesi i njëjtë si për Ramadan Mujën”, ka thënë Çelaj. (b.an)
