Aktorja Zsa Zsa Gabor, u nda nga jeta pas një infarkt në zemër në moshën 99-vjeçare.
Ajo lindi në Hungari dhe emigroi në SHBA gjatë Luftës së Dytë Botërore, ku u shndërrua shumë shpejt në një yll Hollywood-i.
Aktorja ka qenë pjesë e 70 filmave, por më e famshme ishte për stilin e saj të jetesës. Gjatë jetës së saj, Gabor, u martua 9-të herë, ku për herë të parë u martua në moshën 20-vjeçare dhe martesa më e gjatë e saj, ishte martesa e fundit që e bëri në moshën 70-vjeçare.
Emri i saj ishte Sari Gabor, por shumë shpejtë familja e saj filloi t’i fliste Zsa Zsa, emër i cili i mbeti gjatë gjithë jetës së saj private dhe në ekran.
Në vitin 1993, në autobiografinë e saj ”Një jetë nuk mjafton”, aktorja shkroi se e kishte humbur virgjërinë e saj në moshën 15-vjeçare me Qemal Ataturkun, i cili njihet si themeluesi i shtetit modern Turk.
Gjithashtu ajo zbuloi se kishte refuzuar edhe ish presidentin e SHBA-ve, John F. Kennedy si dhe Elvis Presley.
Ndërkohë gjatë një interviste kur ishte e pyetur për marrëdhëniet e mira që kishte me ish bashkëshortët e saj ajo komentoi se asnjëherë nuk e kishte urryer një burrë aq shumë sa t’i kthente diamantet që i kishte dhuruar.
Bashkëshorti i saj, Federic von Anhalt, deklaroi në orët e para të mëngjesit për AFP, se aktorja ishte ndarë nga jeta prej një infarkti në zemër.
“Ajo nuk vdiq vetëm, të gjithë ishin këtu”, ishin fjalët e tij.
Ndërkohë shumë aktor dhe fansa të saj kanë mbushur profilet e tyre të medieve sociale me statuse për aktoren, duke shprehur ngushëllimet e tyre.
shqiptarja.com/d.i.
