ZRPP: 81.5% e pasurive në Shqipëri janë në emër të meshkujve
Shifra tronditëse dalin nga Zyra e Regjistrimit të Pasurive të Paluajtshme, në lidhje me raportin e posedimit të pronave sipas përkatësis gjinore të regjistruara pranë këtyre zyrave. Zyrtarë të lartë të ZRPP-së bëjnë të ditur për JAVANEWS se sipas të dhënave të dokumentuara rreth 81.5% e këtyre pasurive janë të regjistruara në emër të meshkujve. Vetëm 18.5% e pasurive janë të regjistruara në emër të femrave.
Këto të dhëna bëjnë të qartë se pjesa dërrmuese e pasurive janë regjistruar në favor të meshkujve. E drejta e trashëgimisë së pasurisë gradualisht po kthehet në një nga temat ku diskriminimi i femrës është tërësisht i dukshëm, ndonëse fshihet nën kapakët e dosjeve në zyrat e ZRPP-së.
Zyrtarë të lartë të këtij institucioni bëjnë të ditur se “ligji ua jep këtë të drejtë femrave, por institucioni i ZRPP-së bën vetëm regjistrimin e pasurive mbi bazën e dokumentacionit të paraqitur nga subjektet e interesuara konform dispozitave ligjore në fuqi”.
Kanuni vs. Ligjit
Janë prindërit ata të cilët në shumicën e rasteve nuk i përfshijnë vajzat e tyre në të drejtën e trashëgimisë së pasurive që ata disponojnë, duke i lënë jashtë testamentit, ndonëse ligji u’a jep këtë të drejtë. Kjo e drejtë e sanksionuar në ligj, shpesh u hiqet vajzave nëpërmjet një mëndësie kanunore, ku e drejta e trashëgimisë së pasurisë u kalon djemve. Kjo ka bërë që në pjesën më të madhe pasuritë të shkojnë në favor të gjinisë mashkullore.
Zbatimi i metodave ekstraligjore, siç është mendësia e kanunit, ka bërë që në gjykata, thuajse në të gjithë vendin, të ketë një fluks të jashtëzakonshëm çështjesh që janë depozituar, ku femrat kërkojnë të jenë pjesë e trashëgimisë pasurore dhe jo të përjashtohen.
Në shumicën e rasteve problemet që kanë të bëjnë me të drejtën e trashëgimisë, si dhe përpilimin e testamentit, janë kthyer në burim konfliktesh të brendshme familjare midis motrave dhe vëllezërve, vajzave dhe prindërve, konflikte që në jo pak raste kanë pasur përfundime dramatike.
Ar. Me
