Jamarbër Malltezi, dhëndri i Sali Berishës, i cili është duke u gjykuar për korrupsion dhe fshehje të pasurisë nga GJKKO për kompleksin ‘Partizani’ e ka shndërruar profilin e tij në facebook në fletë-rrufe për të demaskuar të gjithë ‘armiqtë’ e vjehrit.
Kësaj radhe, me një gjuhë tipike të ligjërimit soc-realist, objekt ka qenë ish-Sekretari i Shtetit Amerikan, Antony Blinken.
Malltezi e quan ish-zyrtarin e lartë amerikan si ‘zorraxhi të Soros dhe Edit’ dhe me një gjuhë linçuese shprehet se atë e kanë përzënë nga plazhi, duke i dhënë lexuesit të nënkuptojnë se e kanë përzënë se ka shpallur vjehrin dhe bashkëshorten e Malltezit ‘non grata’ për korrupsion madhor dhe minim të demokracisë.
Në fakt, e vërteta e fotos është krejt tjetër.
Mjafton një kërkim i shpejtë në internet dhe sheh disa media të njohura amerikane, të cilat e kanë raportuar si lajm.
Një prej tyre, ‘FoxNews’ (linku: https://www.foxnews.com/us/former-biden-secretary-state-antony-blinken-asked-leave-new-york-beach-lifeguard?utm_source) shprehet se ish-Sekretari Amerikan I Shtetit, Antony Blinken, është parë duke u larguar nga plazhi Georgica në East Hampton (Nju Jork), pasi shpëtimtarët po zbatonin mbylljen e plazheve për shkak të kushteve të rrezikshme të sjella nga Uragani Erin.
“Blinken dhe një mik i tij po shijonin ditën në plazh, por u afrua një shpëtimtar me një mjet patrulle dhe i udhëzoi të largoheshin. Ata u panë duke mbledhur sendet e tyre dhe duke u tërhequr drejt parkingut. Autoritetet lokale sqaruan se plazhet e East Hampton kishin qenë të mbyllura për disa ditë, pasi stuhia kishte sjellë dallgë të forta, rryma të rrezikshme dhe mbeturina. Masat u morën për të garantuar sigurinë e pushuesve dhe stafit.” – thuhet më tej në shkrim.
Shkrimi, gjithashtu, thekson se komunitetet bregdetare në SHBA ishin në gatishmëri për uraganin, ndërsa guvernatorja e Nju Jorkut, Kathy Hochul, u bëri thirrje qytetarëve të tregohen të kujdesshëm.
Pra, foto e postuar dhe e montuar nga Dhëndri i Berishën nuk ka lidhje fare me ndonjë dëbim hipotetik si e paraqet ai, por ka lidhje me një masë krejt normale që më së shumti bëhet për kujdesin e protagonistëve dhe jo për të keqen e tyre.
Po ku i del e keqja Abit, i cili, edhe pse shpëtoi pa u shpallur ‘non grata’ nga Blinken, duket se nuk i del e keqja për vjehrin e tij, falë të cilit ai arriti jo vetëm të përvetësojë pronën, por edhe ta zhvillojë me nëntëmbëdhjetë kulla./ TemA
