Gjykata italiane ka dënuar me tre vjet e tetë muaj burg të ashtuquajturën ‘zonja e drogës’, shqiptaren, Jona Mullaraj.
Mullaraj e cila ishte sipërmarrëse në Itali me banim Saronno, e njohur për mbështetjen e saj ndaj partisë së Salvinit, Lega Nord u arrestua nga karabinierët në fillim të dhjetorit të vitit të kaluar pasi u kap me 450 kilogramë hashash dhe marijuanë.
Gjykata lexoi vendimin ditën e sotme, ku përveç shqiptares u dënua edhe Bruno La Marca me 3 vjet e 10 muaj, përkundër kërkesës së prokurorit i cili kërkonte 7 vjet burg, Alessandro Barbieri me 3 vjet e katër muaj si dhe Rosario Abbene me një vit e gjysmë.
Ndërkaq, avokati i shqiptares Jona Mullaraj ka deklaruar se do të ankimojë vendimin në gjykatën e Apelit. Siç rezultoi nga hetimet e policisë dhe prokurorisë italiane shqiptarja ishte poseduesja e drogës prej 450 kilogramë.
Droga u gjet në një garazhin e Cesano Maderno në via de Medici, ku ishte marrë me qira dhe kontrata ishte nënshkruar nga një grua tjetër, shkruajnë mediat italiane. Pronari i magazinës ku mbahej lënda narkotike, u shpreh në atë kohë se Jona Mullaraj vinte shpesh për të marrë çelësat.
Sipas mediave italiane, 36 vjeçarja Mullaraj është tradhtuar nga një prej bashkëpunëtorëve të saj. Jona Mullaraj ka deklaruar gjithnjë se ajo s’kishte lidhje me ngjarjen dhe akuzat që i drejtohen.
Shqiptarja ishte sipërmarrëse në fushën e ndërtimit dhe tejet aktive politikisht teksa në rrjete sociale postonte foto krah figurave politike, ku mes tyre është dhe kryetari i partisë Lega Nord, Mateo Salvini./m.j
