Me miratimin e pak kohëve më parë të ligjit për Zonat e Lira Ekonomike, qeveria shqiptare rishikoi jo vetëm mënyrën e funksionimit të tyre, por edhe numrin që ishte përcaktuar nga ekzekutivi i mëparshëm. Për njërën nga zonat e lira ekonomike të përcaktuara si “pilot”, atë të Spitallës, afati i dorëzimit të ofertave (pas botimit në mediat ndërkombëtare) përfundon në datë 28 të këtij muaji.
Nga burime zyrtare të Ministrisë së Zhvillimit Ekonomik, Turizmit, Tregtisë dhe Sipërmarrjes mësohet se kanë shfaqur interes disa kompani, kur mes tyre edhe një kompani e madhe kineze. Kompanitë që do të shfaqin interes për t’i zhvilluar këto zona do të kalojnë në një filtër mjaft të detajuar nga ana e ministrisë.
Mësohet se Zona e Lirë Ekonomike e Spitallës nuk do të shërbejë për trajtimin preferencial të kompanive që i përkasin sektorëve si ai i fasonit apo përpunimit, por për degë të tjera të industrisë, për të shmangur ndikimet nga lëndë kimike.
Nga ana tjetër do të ketë një ndarje të sipërfaqes prej 500 hektarësh. Parashikohet që kompania që do të fitojë të drejtën për të qenë zhvilluesi ta kthejë këtë zonë në qendrën më të madhe të eksportit në Shqipëri.
Parku Industrial Spitallë:
Sipërfaqja: 500 ha
Gjëndja: Proces shfaqje oferte
Investimi: Mund të bashkëpunohet ose edhe të transferohet
Llojet e Aktivitetit: Fabrikime, Prodhime, Montime, Importime, Eksportime, Tregëtime, Shërbime
MONITOR
