Analisti Preç Zogaj e cilësoi si pasojë të një “amullie ligjore” dhe mungesës së harmonizimit në legjislacion dekretin e Presidentit Bajram Begaj për datën e zgjedhjeve edhe në Bashkinë e Tiranës.
Në emisionin “Trialog” në RTSH, ai theksoi se presidenti ka kaluar përtej kompetencave të tij, pasi “mund të referojë bazën ligjore mbi vendimin e Këshillit Bashkiak, por nuk ka pse të adresojë padinë apo ankimimin, duke marrë tagrin e Gjykatës Kushtetuese. Kjo, sipas Zogaj, krijon një rebus ligjor.
“Jemi përpara një lloj amullie ligjore dhe ka kondraktisione në shumë ligje dhe nuk ka një harmonizim. Presidenti ka shkuar përtej tagrit të tij pasi mund të referojë bazën ligjore ku mbështetet vendimi i Këshillit Bashkiak por nuk ka pse adreson padinë apo ankimim dhe të marr tagrin e Gjykatës Kushtetuese dhe të thotë se kjo nuk i takon Gjykatës Kushtetuese por asaj Administrative. Kjo krijon një rebus”, tha Zogaj
Lidhur me reagimin e opozitës për dekretin e presidenti Begaj, duke e cilësuar si “noter të qeverisë”, por nga ana tjetër kërkoi sa më parë shkarkimin e Erion Veliajt, për Zogajn është mungesë koherence dhe se ajo po kundërshton vetveten.
“Opozita për koherencë nuk ka pse ngre gjithë këtë stuhi, sepse po kundërshton vetveten. Subjektet politike kanë marrë atributin e të folurit si konstitucionalistë, kur në fakt kanë qenë vetë promotorë të këtij zhvillimi. Ne japim opinione, por duhet të flasin konstitucionalistët, që nuk janë pjesë e Gjykatës Kushtetuese, por fjala e tyre peshon. Ky është një rast tipik ku janë ndërthurur kontradikta ligjore dhe kemi përballë një rebus kushtetues,” tha Zogaj.
