Analisti Preç Zogaj, i ftuar në emisionin “Të Paekspozuarit” në MCN TV, duke komentuar protestën e sotme të opozitës në Kuvendin e Shqipërisë, e lidhi atë me motivimin e ndjekësve për protetën e ardhshme të PD-së të lajmëruar për në datën 22 dhjetor. Zogaj u shpreh megjithatë se kjo protestë e bërë në kuvend nuk do të lërë gjurmë në politikën shqiptare, pasi kreu i PD-së është në armiqësi të hapur me SPAK-un, të cilin e konsideroi si aktor në zhvillimet më të rëndësishme në vend.
“Si e analizoj unë ishte një miniprotestë, ku virtualisht morën edhe disa karrige ministrash si me thënë, për t’u paraqitur si model të ndjekësve të tyre për protestën e ardhshme, që kanë me datën 22, për të galvanizuar situatën për një protestë.
I gjithë problemi është se opozita, Partia Demokratike, nuk është më aktor në këtë luftë, në këtë betejë, sepse aktor tani është vetë SPAK-u.
Ajo nuk është aktor, jo se deputetët e saj nuk kanë bërë përpjekje, se nuk kanë bërë detyrën, por është e bllokuar nga konflikti i interesit me kryetarin e Partisë Demokratike, i cili është vetë i hetuar për një çështje. Një çështje tjetër pritet dhe është thirrur si person që ka dijeni për ngjarjet që është 21 janari, pra ka shumë probleme vetë me SPAK-un.
Vetë ai është pozicionuar si një armik i egër i SPAK-ut, pra institucioni që po i bën këto punë dhe po i bënë këto hetime dhe po i qenë drejt finalizimit këto hetime nga kjo pikëpamje, domethënë ajo është zhurma e tyre për fat të keq.
Edhe protesta e tyre është e destinuar të mos të ketë gjurmë për këtë shkak sepse ka shumë hipokrizi, domethënë ka shumë hipokrizi në këtë betejë, duke qenë se kryetari i tyre është në këtë pozicion, që e konsideron SPAK-un një organizatë kriminale, pra institucionin që e bën këtë punë dhe do ta bëjë këtë punë, se s’ka kush e bën tjetër.
Jashtë SPAK-ut, lufta kundër korrupsionit mbetet pastaj një retorikë foltoresh, siç e kemi parë për shumë e shumë vite, pra në nivelin e retorikës,. lufta kundër korrupsionit nuk ka dhënë dhe nuk jep rezultat. Ndërsa jep rezultat kur drejtësia merr, heton, gjen prova, i vërteton ato që janë gjykatë e kështu me radhë”- tha Zogaj.
