Për analistin Preç Zogaj, kërkesa e Prokurorisë së Posaçme për heqjen e imunitetit të numrit dy të qeverisë nuk ishte “rrufe në qiell të hapur”, por një kwrkesw e pritshme.
Gjatë diskutimit në emisionin “Trialog”, Zogaj theksoi se kjo lëvizje e SPAK ishte thjesht çështje kohe dhe se prokuroria ndjek një logjikë procedurale që është imune ndaj vendimeve të institucioneve të tjera, përfshirë Gjykatën Kushtetuese.
Zogaj bëri një ndarje të qartë mes vendimit të fundit të Gjykatës Kushtetuese (e cila shfuqizoi pezullimin e zyrtarëve nga SPAK pa autorizim) dhe kërkesës për masë sigurie. Sipas tij, SPAK operon me dinamikën e vet hetimore.
“Të gjithë e prisnim. Ishte çështje kohe. Gjykata Kushtetuese, me kërkesë të kryeministrit, e quajti të gabuar vendimin për pezullim deri në shqyrtimin e çështjes. Por kërkesa e SPAK nuk ka lidhje me këtë vendim. Janë dy gjëra të ndryshme,” sqaroi analisti.
Sipas Zogajt, SPAK ka treguar “indiferencë” ndaj lojërave juridike apo interpretimeve kushtetuese kur bëhet fjalë për thelbin e dosjes penale.
“SPAK nuk do t‘ia dijë për vendimet që merr Kushtetuesja, është indiferent në këtë pikë. Kushtetuesja mori vendimin e saj, por SPAK ka punën e vet. Edhe sikur Kushtetuesja të kishte lënë në fuqi vendimin për pezullimin, sërish SPAK do i drejtohej Kuvendit për masën që po kërkon tani”, argumentoi Zogaj.
