Analisti Preç Zogaj, i ftuar në emisionin “Trialog” në RTSh1, është shprehur se gjyqi ndaj ish-krerëve të UÇK-së në Hagë përbën një “intrigë ndërkombëtare”, por sipas tij ata do të shpallen të pafajshëm.
Duke komentuar procesin e Gjykatës Speciale të Hagës, Zogaj tha se është paradoksale që po gjykohet UÇK-ja si “grup i strukturuar kriminal”, ndërkohë që sipas tij ajo ishte një lëvizje politiko-ushtarake e legjitimuar si palë ndërluftuese gjatë luftës në Kosovë.
Ai theksoi gjithashtu rolin e Ibrahim Rugova, duke vlerësuar se Rugova e kishte kufizuar aspiratën kombëtare në një Kosovë të lirë e të pavarur, në miqësi me SHBA-të, Shqipërinë dhe Serbinë, por gjithmonë si shtet i pavarur.
“Paradoksi është se dëgjojmë në Gjykatën Speciale të Hagës, dëgjojmë që gjykohet UCK, gjykohen si grup i strukturuar kriminal dhe lihen të kuptohen veprime që janë kryer gjatë luftës. Lufta është luftë dhe ato janë të legjitimuar si palë luftarake dhe nuk janë legjitimuar si terroristë por si lëvizje që ishte politiko-ushtarake. Ibrahim Rrugova e kufizoi aspiratën kombëtare të Kosovës, e lirë, e pavarur e lidhur me SHBA, miqësi me Shqipërinë dhe me Serbinë, e fuste në miqësi por në një Kosovë të pavarur. Komuniteti ndërkombëtar ja hodhi përgjegjësinë Milloshevicit sepse kjo me paqe nuk bëhej, por e panë që nuk bëhet sepse e kunsumuan shqiptarët pavarësinë përmes paqes” u shpreh Zogaj.
Sa i përket ecurisë së procesit gjyqësor ndaj Hashim Thaçi dhe të tjerëve, Zogaj u shpreh se pret që gjykata të rrëzojë pjesën më të madhe të akuzave, duke përmendur edhe kohëzgjatjen e paraburgimit si faktor. Sipas tij, në këtë çështje ekziston një prapavijë ndërkombëtare në formulimin e akuzës.
“Unë mendoj se gjykata do ta rrëzoj akuzën ose do të lërë ndonjë gjë të vogël por jo në këto përmasa, pra dhe ata do të dalin edhe për shkak të periudhës së gjatë të paraburgimit. Nuk shoh që ka kompensim, këtu ka intrigë ndërkombëtare tek akuza”, tha Zogaj.
