Kërkesa e opozitës për qeveri teknike dhe strategjia e ndjekur nga Partia Demokratike ka qenë tema e diskutimit në emisionin “Trialog” në RTSH. Analisti Preç Zogaj, përballë moderatores Alba Alishani, ka bërë një skaner të mundësive reale që ka sot opozita për të rrëzuar qeverinë, duke vendosur theksin te numrat dhe te figura e Sali Berishës.
Sipas Zogajt, skenari aktual i PD-së është një “déjà vu” e strategjive të së shkuarës, ndërsa kushti i vetëm për të imponuar një qeveri teknike është pjesëmarrja masive popullore, e cila sot mungon.
Zogaj argumentoi se qeveritë teknike nuk vijnë nga dëshirat politike, por nga presioni i sheshit. Ai vendosi një “prag kritik” numerik që opozita duhet ta arrijë nëse do të trondisë themelet e mazhorancës.
“Qeveria teknike mund të provokohet dhe realizohet kur ka pjesëmarrje të dukshme me 100 mijë – 150 mijë njerëz në protesta. Duhet që të bëhen pjesë edhe ata që s‘janë në PD. Nëse nuk ka një masë kritike që i pakëson ajrin qeverisë, vetë qeverisë nuk i bën asnjë përshtypje,” theksoi analisti.
Sipas tij, dy faktorët e vetëm të tjerë që mund të rrëzonin qeverinë janë një krizë e brendshme në mazhorancë, që, sipas tij, “aktualisht nuk ekziston” ose presioni ndërkombëtar.
Berisha dhe “pengesat” e 2025-ës
Duke analizuar lidershipin e opozitës, Zogaj vërejti se PD po përsërit ciklin e vjetër – nga djegia e mandateve te çadra – por me një ndryshim thelbësor: fuqinë e Sali Berishës. Ai bëri një krahasim me vitet e mëparshme të opozitarizmit të Berishës, duke nënvizuar se ish-kryeministri sot nuk e ka më të njëjtën fuqi përbashkuese.
“Berisha mund t’i bëjë ato që ka ndërmend të bëjë, por ai ka pengesat e veta. Berisha nuk mund të bëjë tryeza si i ka bërë në 2004 e 2005,” u shpreh Zogaj, duke iu referuar kohës kur Berisha arriti të krijonte KOP-in.
Në fund, Zogaj vuri në dukje se ndonëse qeveria duket solide, ajo është e ekspozuar përballë drejtësisë së re.
“Nga ana tjetër edhe qeveria është e ekspozuar pasi SPAK po heton. Tek drejtësia janë drejtuar sytë edhe të publikut, edhe të ndërkombëtarëve,” përfundoi ai.
