Një zjarr i fuqishëm ka përfshirë që prej mesditës së sotme fshatin Vranisht, në bashkinë Himarë, duke krijuar një situatë të vështirë për banorët dhe strukturat e emergjencave.
Flakët janë shfaqur rreth orës 12:00 dhe të favorizuara nga erërat e forta dhe temperaturat e larta, janë përhapur me shpejtësi në një sipërfaqe të konsiderueshme.
Zjarri ka përfshirë disa hektarë me pisha dhe sipërfaqe pyjore, ndërsa flakët kanë përparuar edhe në zona me shkurre, barishte dhe pemëtari. Terreni i vështirë dhe era e fortë po e bëjnë të komplikuar ndërhyrjen e forcave zjarrfikëse, të cilat po punojnë për izolimin e vatrave dhe frenimin e përhapjes së zjarrit.
Flakët kanë prekur edhe dy banesa në Vranisht. Një prej tyre është e pabanuar dhe është përfshirë nga zjarri, ndërsa në banesën tjetër flakët kanë prekur oborrin. Për momentin, forcat në terren po punojnë për të parandaluar përhapjen e zjarrit drejt banesave të tjera dhe zonave të banuara.
Për shkak të intensitetit të zjarrit dhe pamundësisë për të ndërhyrë në disa prej vatrave nga toka, në operacion është kërkuar edhe mbështetja nga ajri.
Në Vranisht ka mbërritur një helikopter i Forcave të Armatosura, i cili ka nisur hedhjen e ujit mbi vatrat më aktive. Ndërkohë, për forcimin e operacionit është kërkuar mbërritja e një helikopteri të dytë, si dhe e një mjeti ajror “Air Tractor”, me qëllim përballimin e situatës dhe frenimin e përhapjes së flakëve.
Në terren janë angazhuar forcat zjarrfikëse të Himarës, të cilat po përpiqen të mbajnë nën kontroll frontin e zjarrit dhe të parandalojnë përhapjen e flakëve drejt zonave të banuara.
