Lufta me zjarret vijon ende në parkun kombëtar “Lurë-Mali i Dejës”, por për fat të mirë, tashmë nuk rrezikohen banesa.
Dhjetëra forca dhe dy avionë “Air Tractor” janë angazhuar në operacionin për neutralizimin e flakëve. Situatën nga afër e ka parë edhe kryetari i Bashkisë Dibër, Rahim Spahiu, i cili tha se aktualisht nuk ka rrezik për banesat, ndërsa perimetri i zjarrit dhe mundësia e përhapjes së flakëve janë kufizuar.
Aktualisht në terren janë të angazhuar 115 forca bashkiake, 13 efektivë të Policisë, 11 punonjës të ADZM-së, 14 efektivë të MZSH-së, 7 vullnetarë dhe 50 efektivë të Forcave të Armatosura, të mbështetur nga dy avionë “Air Tractor”.
Edhe në zonën e Bulqizës vijon lufta me flakët. Nga krahu i Bulqizës, zjarri në Qafë-Helmës është shuar, ndërsa aktiv mbetet vetëm fronti në drejtim të Selishtës.
“Nuk ka asnjë rrezik për banesat, janë marrë të gjitha masat dhe zjarri është larguar nga banesat. Po punohet në dy krahët, sipër te kurora ku edhe atje pothuajse është izoluar. Zjarri nuk ka bërë shumë dëm në kurorën e pishave, ka qenë zjarr sipërfaqësor dhe është djegur vetëm bari. Vazhdojnë avionët, na kanë ndihmuar shumë sidomos në zonat ku terreni është i vështirë”, tha kryebashkiaku i Dibrës, Rahim Spahiu.
Ndërkohë, ende nuk dihen dëmet e shkaktuara nga zjarri që ka përfshirë parkun e Lurës, ndërsa pritet që në ditët në vijim strukturat përkatëse të nisin vlerësimin e dëmeve në terren.
