Prej 10 ditësh flakët po shkrumbojnë zona të gjera në Bashkinë e Finiqit, duke vënë në rrezik banesa, biznese dhe sipërfaqe pyjore.
Natën e kaluar, ekipet zjarrfikëse të bashkive Finiq, Delvinë, Konispol e Sarandë, të mbështetura nga pesë mjete zjarrfikëse, 70 efektivë të Forcave të Armatosura dhe 20 efektivë të Policisë së Shtetit, u përballën pa ndërprerje me disa vatra të favorizuara nga era e fortë në fshatrat Velahovë, Livinë, Ardhasovë, Bistricë dhe Krongj.
U kryen evakuime të përkohshme të banorëve në Livinë dhe Ardhasovë, ndërsa u ofrua asistencë mjekësore për të moshuarit. Forcat operacionale dhe vullnetarët siguruan mbrojtjen e çdo banese dhe biznesi të rrezikuar.
Në orët e para të mëngjesit, një operacion i suksesshëm ndaloi përhapjen e flakëve që kërcënonin Hidrocentralin e Bistricës, ndërsa vijon ndërhyrja edhe nga ajri.
Për arsye sigurie, qarkullimi në aksin Muzinë–Bistricë mbetet i kufizuar deri në përfundim të operacioneve.
Autoritetet paralajmërojnë se rreziku i riaktivizimit të vatrave mbetet i lartë për shkak të erës dhe temperaturave ekstreme.
