Zjarr në një pallat në Paris, 8 viktima mes të cilëve dy fëmijë
Një zjarr i fuqishëm ka shkaktuar vdekjen e tetë personave mes të cilëve dy fëmijë, në një pallat në Paris, mëngjesin e sotëm. Zjarri shpërtheu në rrugën “Myrha” në zemër të lagjes “Gut d’or”. Sipas dëshmitarëve okularë dy banorë të tjerë të pallatit u hodhën nga dritaret për të shpëtuar. Ministri i Brendshëm francez Kaznëv dhe kryebashkiakja An Hidalgo si dhe prefekti Mishel Kado shkuan në vendngjarje. Sipas francezes “Le Parizien” e cila citon burimet e ndërhyrjes së shpejtë mendohet se zjarri ka qenë i qëllimshëm.
Zjarrfikësit kishin ndërhyrë për të shuar një tjetër zjarr, në të njëjtën godinë, dy orë para nisjes së tragjedisë, ndaj – sipas zyrtarëve, – hetuesit tashmë po ndjekin pistën kriminale. Skuadrat e zjarrfikësve kishin hyrë në aksion pas një telefonate të marrë në orën 2:23 pas mesnate dhe kishin shuar një zjarr në zonën e shkallëve. Disa prej viktimave, – sipas zyrtarëve, – kanë humbur jetën për shkak të asfiksimit nga tymi, ndërsa të tjerë pasi janë hedhur nga dritaret për t’iu shpëtuar flakëve. Në këtë incident janë plagosur edhe 4 persona të tjerë.
Flakët kanë nisur në katin nëntokë dhe origjina e tyre është ende e paqartë. Në vendngjarje ka mbërritur gjatë natës edhe kryebashkiakja e Parisit, Anne Hidalgo. “Qyteti është në zi”, ka thënë ajo, duke saktësuar se ndërtesa ishte në gjendje të mirë para zjarrit.
