Një ngjarje e rëndë është regjistruar mëngjesin e kësaj të diele në zonën e Fllakës, në Durrës, ku një zjarr ka përfshirë ambientet e një magazine, duke sjellë vdekjen e një shtetasi të huaj dhe plagosjen e një tjetri.
Sipas informacioneve paraprake, zjarri ka shpërthyer rreth orës 08:00 në një nga ambientet e magazinave të një subjekti privat me administrator shtetasin me iniciale S. M. Dyshohet se flakët kanë nisur në hapësirën ku gatuhej për punonjësit, ndërsa shkak paraprak mendohet të jetë shpërthimi i një bombule gazi.
Si pasojë e zjarrit, ka humbur jetën nga asfiksia shtetasi me inicialet O. M., rreth 25 vjeç, me origjinë nga Bangladeshi. Ndërkohë, një tjetër punonjës, shtetasi Ch. Ch., rreth 30 vjeç nga Kenia, është transportuar në spital, ku po merr ndihmë mjekësore.
Në vendngjarje mbërritën menjëherë shërbimet e Policisë dhe forcat zjarrfikëse, të cilat bënë të mundur izolimin dhe shuarjen e flakëve.
Ndërkohë, grupi hetimor, nën drejtimin e Prokurorisë, ka nisur hetimet për të zbardhur plotësisht rrethanat e ngjarjes, shkaqet e zjarrit dhe për dokumentimin ligjor të rastit.
