Gratë shtatzëna dhe partnerët e tyre janë paralajmëruar që të mos shkojnë në një komunitet të vogël në veri të qendrës së Majamit, Florida, ku virusi Zika është aktiv. Paralajmërimi është publikuar nga Qendra për Kontrollin e Sëmundjeve.
Sipas mediave ndërkombëtare, kjo është hera e parë që ky organizëm paralajmëron njerëzit që të mos shkojnë në një lagje amerikane për shkak të kësaj sëmundje infektuese. Paralajmërimi u bë pasi 10 persona të tjerë në Florida u diagnostikuan me virusin Zika pasi u pickuan nga mushkonjat lokale, duke e çuar totalin në 14.
Autoritetet lokale thanë se i kanë kërkuar Qendrës për Kontrollin e Sëmundjeve që të dërgojë ekipet e saj të emergjencës në zonë për të luftuar virusin Zika.
Sipas tyre, rastet e reja u zbuluan pas vizitave derë më derë për të paktën 200 njerëz në shtëpitë dhe bizneset e tyre.
Autoritetet kanë shtuar se në zonën në fjalë në Majami ekziston rreziku i infektimi të mëtejshëm dhe prandaj janë paralajmëruar gratë shtatzëna që të mos shkojnë atje, ndërsa ato që kanë shkuar të bëjnë menjëherë analizat, transmeton Shekulli.
Zyrtarët amerikanë mendojnë se virusi Zika duhet të ketë ardhur në këtë komunitet nga një amerikan që është kthyer nga Amerika Latine me të dhe më pas mushkonjat e zonës e kanë marrë nga ai apo ajo dhe e kanë transmetuar tek njerëz të tjerë. (b.an)
