Detaje të reja janë zbuluar në lidhje me grabitjen e bankomateve në kryeqytet, aksion i goditur nga sektori i Krimit Kibernetik pranë Policisë së Tiranës.
Sipas burimeve për Vizion Plus shtetasit e huaj nga Rumania arrinin që të klononin karta bankomati dhe kanë arritur që të marrin rreth 5 milionë lekë.
Viktimë në këtë skemë kanë rënë banka të nivelit të dytë edhe disa qytetarë të vendit, ku autorët kanë arritur që të klonojnë kartat e tyre dhe më pas kanë bërë tërheqjen e shumave të parave.
Krimi Kibernetik prej disa ditësh i kishte në ndjekje autorët, teksa policia kishte ofruar më herët 5 mijë euro për këdo që kishte informacion për autorët.
“Ditën e sotme, më datë 06.01.2024, jemi njoftuar për një vjedhje, të mbetur në tentativë, gjatë orëve të para të mëngjesit, në zonën e shërbimit 24/7 të klientëve, në një institucion financiar në kryeqytet.
Nga veprimet e para hetimore të kryera në vendngjarje, janë sekuestruar pamjet filmike me fotot e autorëve të dyshuar.
DVP Tiranë fton qytetarët që të japin informacion për autorët e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorëve”, njoftonte policia.
Në kërkim janë shpallur Florin Oprinoiu, Marian Mihai dhe Adrian Simoiu. Nga veprimet hetimore të kryera ka rezultuar se këta shtetas, janë autorë të 2 rasteve të mbetur në tentativë, 1 vjedhjeje në datë 06.01.2024, dhe të 3 vjedhjeve të tjera, të ndodhura më datë 09.12.2023.
/a.r
