Nga Konferenca e Kryetarëve, deputetja demokrate Ina Zhupa e ka cilësuar ligjvënie elektorale, futjen në axhendë të Paketës së Maleve, të prezantuar më herët nga qeveria Rama.
Gjatë diskutimeve, Zhupa është shprehur se grantet e dhëna, janë grante elektorale, në këmbim të votës për PS.
Sipas ligjvënëses së PD, Kodi Zgjedhor ndalon shpërndarjen e granteve në kohë zgjedhore, teksa kërkoi nga kryetarja e Kuvendit, Elisa Spiropali ta heqë nga kalendari i Punimeve.
Ne jemi mbledhur më 20 janar dhe Paketa e Maleve nuk ka rezultuar në projekt-kalendar. Tani na del që e paskan depozituar në datën 10 janar.
E keni futur për në seancë plenare, sepse po e përdorni Kuvendin si aset elektoral dhe po bëni ligjvënie elektorale, me qëllim shpërndarjen e favoreve dhe parasë publike, për të marrë votën për Partinë Socialiste.
Ju parashikoni të jepni grante për të marrë vota. Kodi Zgjedhor e ndalon këtë shpërndarje grantesh në kohë zgjedhore, por ju nuk pyesni.
Ndërkohë ligjet e ministrave tuaj i kaloni me korsinë e shpejtë, ndërsa nismat e deputetëve kanë me vite që nuk shqyrtohen.
Hiqeni urgjentisht nga kalendari, sepse jeni në shkelje të Kodit Zgjedhor.
