Monika Karimanoviç, një 12-vjeçare nga një fshat i qytetit të Nishit në Serbi ishte nisur për në shkollë. Por prej shtatë ditësh nuk ka asnjë lajm për të. Qindra policë dhe forca të kërkimit janë angazhuar në zonën e Nishit për ta gjetur të miturën.

Hetuesit serbë kanë arritur tek një i dyshuar, Ninoslav Jovanoviç, i njohur për organet e drejtësisë më parë pasi ka qenë dhe disa herë të tjera në burg me vite. Policia ka gjetur në shtëpinë e një kushëriri të të dyshuarit flokë që e kanë lidhur me të dyshuarin, që njihet si “Berberi”, pasi viktimat e mitura që ka përdhunuar disa herë, u ka prerë dhe flokët.

Në kërkim, janë përfshirë edhe xhandarmëria dhe në terren, krerët e policisë serbe kanë deklaruar se kanë indicie që viktima është gjallë.

“Kemi gjetur disa gjurmë konkrete në disa vende dhe kemi dy dëshmitarë që vërtetojnë se e kanë parë Jovanoviç me vajzën duke ecur dhe besojmë se Monika është gjallë. Shpresojmë që do e gjejmë sa më parë, pasi kemi angazhuar numrin maksimal të burimeve tona”, deklaroi kreu i policisë, Vlladimir Rebiç.

Por kërkimi vazhdon edhe ditën e dytë. Kjo situatë ka alarmuar tërë Serbinë, pasi i dyshuari kishte dalë nga burgu në muajin Mars, ku ndodhej pasi kishte ngacmuar përmes internetit femra të ndryshme me ofertat për të shitur flokët e tyre.

Presidenti serb, Alleksandar Vuçiç, theksoi se gjetja e kësaj vajze që mendohet se po mbahet nga i dyshuari është prioritet.

“Gjithë natën kam qëndruar në linjë me shefin e Policisë dhe Ministrit dhe sot gjithashtu. Më shumë detaje do të ketë kur ta kapim atë mostër, por natyrisht se është një prioritet pasi bëhet fjalë për një fëmijë dhe është e rëndë”.

Kërkimet në terren kanë vazhduar prej dy ditësh dhe policia po përdorë dhe kamera termike. Në kërkim janë angazhuar të gjitha njësitet me rreth 300 hetues. /e.s/