Zhduken 3 të rinj në Malësi të Madhe/ Dyshohet të jenë vrarë pas konfliktit për kanabisin

Tre djem të rinj janë denoncuar të zhdukur në fshatin Vrith të Malësisë së Madhe.

Ata janë zhdukur që nga mbrëmja e së shtunës, ndërkohë që të afërmit druhen për më të keqen.

Të zhdukurit janë 37-vjeçari Vilson Çutaj nga Bajza e Malësisë së Madhe, Klement Pepaj 21 vjeç nga fshati Vrith, të cilët dyshohet se mund të jenë vrarë.

I zhdukur gjithashtu është deklaruar edhe 25-vjeçari Danjel Pepaj, i cili mendohet se mund të ketë gisht në vrasjen e tyre.

Dyshohet se zhdukja e të rinjve ka lidhje me kultivimin e kanabisit në fshatin Vuç Shkurtaj të Malësisë së Madhe.

Dyshohet se zhdukja e tyre ka lidhje me vjedhjen e një sasie kanabisi pasi kishin parcela të mbjella me bimë narkotike, çka ka sjellë edhe konfliktin.

Nga hetimet paraprake dyshohet se dy të zhdukurit Vilson Çutaj dhe Klement Pepaj, kushërinj mes tyre kanë marrë peng për disa orë Danjel Pepaj, duke e akuzuar se u ka vjedhur kanabis dhe gjatë kësaj kohe e kanë rrahur.

Pasditen e 3 tetorit ata janë takuar sërish në një lokal në fshatin Vrith ku kanë debatuar dhe që nga ajo mbrëmje nuk ka më gjurmë prej tyre.

Teksa policia dyshon se Vilson Çutaj dhe Klement Pepaj mund të jenë vrarë nga Danjel Pepaj në shenjë hakmarrje, ndërkohë vijojnë kërkimet për gjetjen e tyre.

Denoncimi fillestar u bë nga gazetari investigativ Artan Hoxha. Përmes një statusi në rrjetet sociale, gazetari shkruante për një vrasje të trefishtë në fshatrat e Shkodrës.

Të tre personat e mësipërm, sipas Hixhës,  janë zhdukur pa lënë gjurmë dhe se dyshohet se janë vrarë për shkak të parcelave të kanabisit. Ndërkohë që lidhur me rastin nuk ka asnjë reagim nga Policia e Shtetit.

g.kosovari