Policia e Korçës vuri në pranga dy persona, babë e bir pasi akuzohen se mbrëmjen e djeshme plagosën krushkun e tyre. Petrit Çaushllari 47 vjeç dhe djali i tij Emiljano Çaushllari 21 vjeç, të dy banues në fshatin Buçimas të Pogradecit ranë në pranga pasi dje në fshatin Dërsnik të Korçës për motive të dobëta, kanë goditur me mjete të forta në kokë dhe trup, shtetasit P.B 60 vjeç, si edhe djalin e tij shtetasin S.B 26 vjeç, në banesën e këtyre të fundit.
Autorët e dyshuar të ngjarjes, kanë lidhje krushqie me dy të plagosurit, pasi vajza e Petrit Çaushllarit është nusja e djalit të shtetasit P.B dhe kunata e S.B. P.B aktualisht ndodhet në Spitalin Rajonal të Korçës, nën kujdesin intensiv të mjekëve. Katër shtetasit e mësipërm dyshohet të jenë përfshirë në këtë konflikt fizik mes tyre pas një debati për motive të dobëta, kryer midis shtetasit P.B dhe nuses të djalit të tij. Materialet i kaluan Prokurorisë të Rrethit Gjyqësor Korçë për veprën penale : “Plagosja e rëndë me dashje, kryer në bashkëpunim”.
