Pas Burrelit edhe në Klos janë djegur materialet zgjedhore. Pas situatës së tensionuar, mbështetës të opozitës kanë arritur të nxjerrin jashtë KZAZ 17 materialet zgjedhore, duke i vënë më pas flakën.
Dy bashkitë kërkojnë të zbatojnë dekretin e presidentit Ilir Meta i cili anuloi 30 qershorin si datën e zgjedhjeve vendore. Meta kur zhdekretoi 30 qershorin deklaroi se ndërmori këtë veprim për të qetësuar politikën, por veprimi i tij i ka hedhur më shumë ‘benzinë’ zjarrit.
Militantët e PD-së u futën brenda ambienteve të KZAZ-së Nr. 17 në Klos duke hedhur materialet zgjedhore nga dritarja, ndërsa më pas u vendosën flakën nën thirrjet ‘Rama ik’, ‘nuk ka zgjedhje pa PD-në’. Policia nuk ka arritur që ti ndalojë militantët e opozitës.
12 persona janë arrestuar pas sulmit të KZAZ-së në Tropojë dhe flakës që i vendosën në Shkodër. Tre punonjës të bashkisë dhe dy militantë të PD-së janë arrestuar gjatë natës në Shkodër pas incidenteve në shkollën ‘Shejnaze Juka’, ku është vendosur KZAZ-ja nr.3, që u sulmua nga militantët e opozitës, të cilët i vendosën flakën godinës duke përdorur benzinë. Të arrestuarit janë Gentian Bytyqi dhe Alfred Nikolli, dy policë të bashkisë, specialisti i bujqësisë Adi Garuci dhe Aleks Ndoj me O. Th. 17 vjeç, militantë të PD-së.
Pesë personat janë arrestuar mbrëmë gjatë natës pas evidentimit të pamjeve nga ekspertët e policisë. Pritet që gjatë ditës së sotme mund të ketë të tjera arrestime nga policia e Shkodrës pas incidenteve të ndodhura në KZAZ-në e Shkodrës. Po për Shkodrën janë shpallur në kërkim 14 persona dhe janë proceduar 2 në gjendje të lirë. Ndërsa në Tropojë u arrestuan 7 persona, 6 janë shpallur në kërkim dhe 5 po hetohen në gjendje të lirë.
