Ish-sekretarja amerikane e shtetit, Hillary Clinton, dhe aleatët e saj si Shqipëria bënë përpjekje të pabesueshme për të larguar gratë e pambrojtura nga Afganistani gjatë ditëve kaotike të fundit të luftës më të gjatë të Amerikës.
Kjo duke shkuar aq larg sa përdorën një kod QR nga një qese me patatina për të realizuar një vizë të huaj.
Të paktën kështu shkruhet në rreshtat e një libri të publikuar së fundmi.
Lufta e Clintonit për t’i nxjerrë gratë e pambrojtura nga jashtë është përshkruar me shumë detaje.
Pavarësisht lidhjeve të saj, Clinton nuk ishte në gjendje të merrte mbështetjen që i nevojitej nga qeveria federale, e cila tashmë ishte e stërmbushur me sigurimin që çdo qytetar amerikan dhe ata me dokumente të tjera zyrtare të mund të dilnin në kohë, sipas librit, i cili tregon sagën mbi kapituj të shumtë.
Këshilltari për sigurinë kombëtare të Biden, Jake Sullivan, një ish-ndihmës i Clintonit, thuhet se e qortoi atë pasi ajo telefonoi Presidentin ukrainas Volodymyr Zelenskyy për të kërkuar mbështetje shtesë.
Nga një listë me 1500 emra, Clinton dhe aleatët e saj zgjodhën 60 gra që të fillonin udhëtimin në rrjetin e shtëpive të sigurta që ata organizuan në Kabul për t’i ndihmuar të arrinin në Aeroportin Ndërkombëtar Hamid Karzai.
Për t’u siguruar që do të kalonin, Sekretari i Mbrojtjes Lloyd Austin i kishte thënë Clintonit se gratë duhet të vishnin diçka që do t’ua bënte të lehtë të dilnin nga turma e njerëzve të dëshpëruar për të hipur në një nga aeroplanët e fundit.
Përpjekja e tyre e parë dështoi.
Pas dështimit, ndihmësit e Clintonit organizuan një seri lëvizjesh me autobusë.
Ata gjithashtu do të shoqëroheshin nga persona nga Katari, të cilët do të siguronin që autobusët të kalonin në aeroport pa asnjë problem.
Por talebanët, të cilët në fakt ishin përgjegjës për pjesën më të madhe të sigurisë së aeroportit, hipën papritur në një autobus.
Ata kërkuan që gratë të kishin viza shqiptare.
(Clinton kishte negociuar që gratë të jetonin në banesa të përkohshme në Shqipëri përpara se të niseshin për në Kanada.)
Një anëtar i stafit për Vital Voices, një nga organizatat jofitimprurëse në rrjetin e Clintonit, ishte në gjendje të krijonte viza elektronike për t’i dërguar në telefonat e grave.
Zyrtarët shqiptarë, shkroi Foer, donin ta bënin dokumentin digjital të dukej më zyrtar.
Në mënyrë të pabesueshme, ata zgjodhën një zgjidhje të teknologjisë së ulët.
“Shqiptarët mendonin se një kod QR do ta bënte emailin të dukej më zyrtar”, ka shkruar Foer.
“Meqenëse ishte një qese me patatatina diku aty, ata bënë një foto të kodit QR në anën e paketimit dhe ia shtuan vizës së përmirësuar”.
Talebanët më vonë miratuan vizat. Gratë ishin në gjendje të hipnin në fluturimin e tyre.(Albaniapost)
