Politika shqiptare ka përshëndetur zgjidhjen e ngërçit politik në Kosovë, duke uruar Dimal Bashën për zgjedhjen në krye të Kuvendit. Në një postim në rrjetet sociale, Presidenti Bajram Begaj thekson rëndësinë e bashkëpunimit politik dhe institucional, duke uruar që të vijojë në Kosovë.
“Urime, z. Dimal Basha, për zgjedhjen në krye të Kuvendit të Kosovës! Bashkëpunimi politik dhe institucional është një domosdoshmëri që uroj dhe shpresoj të vijojë në të mirë të Kosovës e qytetarëve të saj”, shkruan Begaj.
Kryetarja e Kuvendit, Elisa Spiropali, teksa përgëzon Kuvendin e Kosovës, shkruan se pret të rifillojë bashkëpunimin “e ngushtë vëllazëror” mes dy Kuvendeve.
“Urime e sukses Kryetarit të ri, të sapozgjedhur, të Kuvendit të Kosovës, Dimal Basha! Përgëzime Kuvendit të Kosovës, për çeljen e rrugës për ndërtimin e institucioneve të reja demokratike pas zgjedhjeve. Mezi pres të rifillojmë bashkëpunimin e ngushtë vëllazëror mes Kuvendit të Shqipërisë dhe Kuvendit të Kosovës, për të mirën e qytetarëve tanë, për mbështetjen e integrimit euroatlantik të dy vendeve tona, dhe garantimin e mbrojtjen e të drejtave të shqiptarëve në rajon”, shkruan Spiropali.
Dimal Basha u zgjodh në krye të Kuvendit të Kosovës me 73 vota pro, duke i hapur rrugë konstituimit të Kuvendit dhe formimit të qeverisë së re. Po ditë e sotme, deputetët pritet të mblidhen për të zgjedhur edhe 5 nënkryetarët. Me emërimin e 5 nënkryetarëve, Kuvendi i Kosovës arrin konstituimin e plotë të tij.
