“Nuk kam asnjë dyshim që në të gjitha anët dhe nivelet ka njerëz te arsyeshëm që janë duke kërkuar një zgjidhje”. Kështu është shprehur për mediat, ambasadorja franceze në Shqipëri Christine Vasac, duke zbuluar se negociatat mes palëve kanë nisur tashmë, larg syrit publik dhe mediatik.
Vasac ka thënë të shtunën nga Korça se zgjidha nuk do të vijë nga ndërkombëtarët por do të vijë nga vetë shqiptarët dhe siç thotë ajo gjërat janë vënë në lëvizje për të gjetur një zgjidhje. Pra negociatat duket se kanë nisur.
“Për politikën shqiptare asnjëherë nuk themi asnjëherë, nuk mund ta fsheh të gjithë e dimë që situata është e tillë jemi në një krizë politike, nuk kam asnjë dyshim që në të gjitha anët dhe nivelet ka njerëz te arsyeshëm që janë duke kërkuar një zgjidhje.
Ju e dini mirë që nuk është një diplomat i huaj që t’i japë një zgjidhje kësaj situate, por njerëzit e këtij vendi meritojnë një zgjidhje të arsyeshme”, është shprehur Vasac.
Nisjen e negociatave mes Ramës e Bashës e ka nënkuptuar më herët edhe Presidenti Meta për të cilën ka shkruar realstory.al. “Nuk arrihet çelja e negociatave me qoka ndërkombëtare, vetëm me standarde. Këtë Edi, unë dhe Luli e dimë shumë mirë. Duan ta zgjidhin diku tjetër? Ata e dinë që është një adresë serioze ku mund të shkojnë ta zgjidhin këtë dhe unë i jap garanci për mbështetje”, tha Meta pak ditë më herët duke aluduar me ironi se Basha e Rama kanë nisur negociatat me ndërkombëtarët. Nisur dhe nga deklarata e ambasadores franceze, duket se negociatat qenkan të vërteta.
Ambasadorja ka zbuluar edhe telefonatën mes presidentit të Francës Emmanuel Macron dhe kryeministrit Rama, duke thënë se kjo është një shenjë pozitive për Shqipërinë.
“Edhe njëherë nuk më takon mua të prononcohem me këtë temë, ashtu siç mund ta dini para 3 ditësh ka pasur një telefonatë midis presidentit Macron me zotin Rama, kjo është diçka e mirë, pozitive, unë nuk mund të them diçka me detaje sepse nuk isha gjatë kësaj bisede por e vlerësoj. Ju duhet ta dini dhe vetë populli shqiptar duhet të jetë i qartë nëse është gati për Bashkim Europian”, është shprehur Vasac.
Përsa i përket hapjes së negociatave në tetor, ambasadorja deklaron se deri në tetor mund të ndodhin shumë gjëra dhe se Shqipëria duhet të vërtetojë se është gati për këtë hap.
“Politika është gjithashtu, te gjithë njerëzit, ju po më drejtoni pyetjen mbi qëndrimin e Holandës dhe Gjermanisë nuk di t’u them por edhe me Francën nuk di t’u them diçka, por nuk është diçka e mbyllur.
Nuk ka diçka të mbyllur sepse ka ende kohë deri ne muajin tetor dhe mund të ndodhin shumë gjëra deri në tetor. Në lidhje me këtë do doja t’u drejtoheshit fjalimit në Serbi të Macron, aty ka gjëra të rëndësishme që kanë për të ndryshuar.
Ju e dini por edhe unë po e përsëris, Shqipëria ashtu si dhe vendet e tjera në rajon kanë vendin e tyre në Bashkimin Europian.
Ashtu si Fenixi ne rilindim nga hiri dhe në lidhje me Shqipërinë, Shqipëria nuk është duke u djegur”, u shpreh Vasac.
