Komisioni Qendror i Zgjedhjeve vendosi të premten të hapë kutitë e votimit dhe ato të materialeve zgjedhore të përdorura në zgjedhjet vendore të 21 qershorit 2015, duke i hapur rrugën asgjësimit të tyre, siç parashikohet në kodin zgjedhor. Sipas vendimit të sotëm të KQZ-së, hapja e kutive të votimit do të fillojë më 16 mars dhe do të përfundojë më 15 maj. Për asgjësimin e fletëvotimeve fillimisht do të përdoret metoda e riciklimit dhe në rast se mund të ketë probleme do të vijohet me metodën e djegies, që konsiderohet si mënyra më e shpejtë dhe më e sigurtë. Për realizimin e këtij procesi është parashikuar një p/buxhet prej rreth 5.3 milion lekësh. Kodi Zgjedhor, në nenin 178, përcakton detyrimin ligjor që KQZ ka për të hapur të gjitha kutitë e votimit dhe materialeve zgjedhore, gjashtë muaj pas shpalljes së rezultatit përfundimtar të zgjedhjeve.
Zgjedhjet vendore-KQZ vendos asgjësimin e fletëve të votimit
