Kryetari i Lëvizjes për Zhvillim Kombëtar, Dashamir Shehi, është shprehur se gjatë takimit për konsultimin e datës së zgjedhjeve ditën e sotme me Presidentin Bajram Begaj, i ka kërkuar vendosjen e datës 4 për mbajtjen e zgjedhjeve.
Komentet Shehi i bëri në ‘Ditari Qëndror’ me gazetaren Loneta Progni në A2 CNN, ku tregoi edhe arsyet pse kanë zgjedhur këtë datë.
Ai tha se njëra nga 4 datat në diskutim përkon me Pashkët, ndërsa data 9 maj i bie ‘beteja mbi nazifashizmin’, e cila sipas tij, ndikon në zgjedhje, për shkak të propagandës që pritet të bëjë kryeministri Rama.
Shehi foli gjithashtu edhe për tentativat për të krijuar një grup të përbashkët për të hyrë në zgjedhje, bashkë me Enkelejd Alibeajn.
“Ne kemi pretenduar datën 4 maj për këto arsye. Sepse këto diskutuam sot me Presidentin. Këtu 4 data janë, njëra bie datë pashkësh. Data 9 i bie beteja mbi nazifashizmin. Para zgjedhjeve, afektojnë procesin zgjedhor këto propaganda, sepse këto i dominon qeveria.
Ne gjykojmë që është më e rëndësishme që fusha të jetë e pastër për këto propaganda. Pastaj atë periudhë do të mbahet edhe Samiti i Komunitetit politik në Tiranë. Ne pretendojmë të bëhen në datën 4 këto dhe pastaj Rama ta vazhdojë mandatin deri në shtator.
Nëse kemi mundësi ta heqim një faktor që ndikon te zgjedhjet, ta heqim. Këtë e ka në dorë Presidenti dhe nëse nuk e bën ska sens, sepse kjo është një gjë fare e vogël që i jepet në dorë opozitës.
Me Alibeajn e kemi bërë një tentativë të parë për të krijuar një grup, sot kemi bërë edhe një konferencë për çështjet e dhunës. Unë besoj se do të arrijmë ta krijojmë një grup, por nuk i dihet, histori shqiptare është kjo”, tha Shehi.
/a.r
