Ibsen Elezi mendon se ish deputeti i PD, Ervin Salianji duhet të ishte kandidat në garën për kryetar të PD-së. Ai kujtoi se në fillim Salianjin e shpallën hero në PD, por më pas doli armik, dhe kjo sipas tij, tregon se në parti nuk ka rregull dhe se mungon transparenca dhe besimi.
“Çdokush duhet të njihet me kriteret, gara duhet të jenë transparente. PD e ka quajtur burgosje politike dhe Salianjin e shpalli hero. Sipas qëndrimeve të PD, ky penalitet, pra dënimi i tij, nuk duhet të ishte pengesë për Salianjin. Ai ka marrë një barrë për partinë në përballje politike me kundërshtarin politik. Dhe barra e penalitetit të z. Salianji i lind drejtpërsëdrejti nga penaliteti që i kanë dhënë strukturat e kësaj partie. Salianji duhet të ishte kandidat, sepse nuk mund të përjashtohej nëpërmjet këtij neni, sepse kjo e fut PD në një qorrsokak tjetër: një ditë të shpallin hero dhe një ditë armik, kështu bëhesh subjekt i pabesueshëm”, tha ai.
Elezi nënvizoi se një forcë politike duhet të përmirësohet dhe jo të degradohet në gjendjen që është PD sot.
“Berisha ecën me dy objektiva: një që e shpall dhe një që e ka në mendjen e vet. Berisha nuk është Noka, Vokshi apo Edi Paloka. Berisha e ka formimin dhe inteligjencën, dhe po e çon me vetëdije drejt shkatërrimit subjektin politik. A e ka mision apo është i kapur peng për shkak të situatës familjare në të cilën ndodhet, kjo ha diskutim. E kam thënë që kjo forcë po shkon drejt degradimit. Sepse po thyen kolonat e kësaj ndërtese që janë, funksionimi institucional, Kryesia, Këshilli Kombëtar, çon në zhbërjen graduale të PD dhe sjell uljen elektorale të saj”, tha ai.
