Kryesia e Partisë Socialiste shqyrtoi sot procesin e kandidaturave për kryetarë të Partisë Socialiste në 61 bashki. Zëdhënësja e Kryesisë së PS-së, Elisa Spiropali deklaroi në përfundim të mbledhjes se, ecuria është normale. “Po bëhet një përzgjedhje në bazë të kritereve, për të bërë të mundur zgjedhjen e kandidatëve më të mirë që do të na çojnë drejt fitores së zgjedhjeve të 2017-ës. Të hënën tjetër është mbledhja e radhës e Kryesisë së Partisë Socialiste dhe në datat 27, 28, 29 maj do mbahet procesi zgjedhor në të gjitha qarqet dhe në të gjitha bashkitë e vendit për zgjedhjen e kryetarëve të partisë”, u shpreh Spiropali.
Po sot u mblodh dhe grupi parlamentar i Partisë Socialiste, por ndryshe nga sa pritej çështja e përgjimeve nuk ka qenë në rend të ditës. Nga të dhënat e fundit mësohet se, grupi ka diskutuar çështje organizative sepse javën e ardhshme do të kenë zgjedhjet në struktura. Në mbledhje mësohet se është folur edhe për rastin e Shukri Xhelilit, nisur nga fakti se Dibra do të ketë një kryetar të ri bashkie.
