Disa studentë janë kundër mbajtjes së zgjedhjeve për universitetet në datën 12 qershor. Një grup prej tyre, por edhe ish-studentë, i janë drejtuar ministres së Arsimit me anë të një letre të hapur, ku e quajnë procesin si jo korrekt.
“Sipas vleresimit tonë, duke marrë parasysh rekomandimet e Organizates Botërore të Shëndetësisë mbi shmangien e aktiviteteve që mund të ndikojnë në përhapjen e metejshme të Covid-19, si dhe masat e marra nga shteti shqiptar, ky proces është i parealizueshem dhe nuk garanton të drejtën parësore të procesit, atë të votes”, thuhet në letër.
Studentët po ashtu kanë rezerva edhe për mundësinë e shpalosjes së programit nga ana e kandidatëve, të cilin e shohin si proces të pamundur.
“Më tej, po në vazhdën e efekteve të masave të ndërmarra në kuadër të pandemisë Covid-19, duam t’ju sjellim në vëmendje se në këto rrethana, procesi i zhvillimit të fushatës dhe prezantimit të platformës nga kandidatët për Senat Akademik dhe Rektor, është përjashtues dhe i pamundur.
Për më tepër, po i’u rikujtojmë se me vendim të Parlamentit të Shqipërisë, vendi ynë gjendet në masa të gjendjes së jashtëzakonshme si pasojë e pandemisë deri në datën 23.06.2020 dhe referuar nenit 170, pika 6 të Kushtetutës së Republikës së Shqipërisë, “gjatë periudhës së zbatimit të masave të jashtëzakonshme nuk mund të zhvillohen zgjedhje vendore, nuk mund të zhvillohet referendum si dhe nuk mund të zgjidhet President i ri”, shkruhet në letrën e studentëve.
/a.r
